Жыл басынан бері Жамбыл облысы ІІД Криминалдық поли­ция басқармасы криминал­дық іздестіру бөлімінің қызметкер­лерімен бұрын іздеуде жүрген 180 тұлға ұсталды. Оның тоғызы – өзге мемлекет азаматтары.
Ал, таяуда ізкесушілермен 21 қылмыскер іздестіріліп табылды. Оның бесеуіне бұрын, екеуіне өткен жылы іздеу жариялан­ған болса, қалғандары із-түссіз жоғалып кеткендер санатында­ғы адамдар еді. Ұсталғандардың арасында екі кісі өлтіруші, төрт қарақшы мен тонаушы бар.
Өткен жылғы желтоқсан ай­ында РФ Кемеров облысының Белов қаласында туған 50 жас­тағы азаматшаны Жаңатас қа­ласындағы саяжайда өлтір­ген 30 жастағы азамат қолға түсті. Владимир жеті айдан соң 16 шілде күні жамбылдық ізкесушілер­мен оңтүстік астананың темір- жол бекеті маңында ұсталды. Қашқын Алматы қаласындағы қонақ үйлердің бірінде әртүрлі жұмыстар атқарып, мекеменің жер төлесінде тұрған.
Жамбыл облысының тәртіп сақ­шыларына 2009 жылдың сәуір айында Меркі селосында­ғы дүкенде сатушы болып істейтін әйелге қару­лы шабуыл жасаған қауіп­ті қылмыскерді қолға түсіруге бір жылдан астам уақыт қажет бол­ған.
– Қашқын бір жылдай Аты­рау қаласындағы анасының туыстарында жасырынып жүр­ген. Жедел-іздестіру іс-шара­сы барысында 22 жастағы қылмыс­кердің ата-анасы үйіне келіп тұра­тындығы белгілі болды. Біз оны Сарысу ауданының Бай­қадам ауылында бір аптадай торуылдадық, – дейді ІІД КПБ аға жедел уәкілі, полиция май­оры Мақсат Юсупов.
Облыс ІІД Криминалдық поли­ция басқармасы бастығының орынбасары, полиция полковнигі Дмитрий Курбановтың айтуынша, негізгі мақсат – Қазақстан Рес­публикасында, сонымен қатар, оның шекарасынан тыс аймақ­тарда іздеуде жүрген аса қа­уіпті қылмыскерлерді ұстау. Бас­қармаға республиканың өз­ге де аймақтарынан және шет- елдерден іздеуде жүрген тұл­ғалар туралы бағдарлар жібе­ріледі. Сондықтан да жедел уә­кіл­дерге кісі өлтірушілермен, қа­рақшылармен, тағы басқа қа­уіп­ті қылмыскерлермен жұмыс істеуге тура келеді. Олардың тынымсыз жұмысына бірінші кезекте кәсіби тәжірибе мен сезімталдық, сонан соң сәттілік көмектеседі.

Роза ҚАЛДЫБЕКОВА,Жамбыл облысы
Заң газеті,23.07.2010